ఆలయం నందు భక్తులు తలనీలను సమర్పించుకోవడానికి కల్యాణ కట్ట ఏర్పాటు చేయడంజరిగింది. ఆలయ సమీపంలో భృగుతీర్థం విశాలమైన మరియు ప్రశాంత వాతావరణంలో భక్తులకు స్నానాచరణలకు ఏంతో ఉపయోగం. ప్రధానాలయం తూర్పు గోపురం సమీపంలోనే స్వామివారికి పూజా సామాగ్రి దుకాణాలు ఉన్నాయి.  కదిరి దేవాలయంలో ప్రధానాలయం ప్రాంగణం చాలా విశాలంగా ప్రశాంతగా భక్తులకు విచిత్రమైన అనుభూతిని కలుగజేస్తుంది. ప్రధానాలయం కుడివైపున కోదండరామాలయం కలదు. సీతాలక్షణ హనుమంత సహిత శ్రీరామూల వారు కొలువైఉన్న ఈ ఆలయంలోని ప్రాకారాలన్నీ అలనాటి రాజుల సంస్కృతీ సాంప్రదాయాలను గుర్తు చేస్తాయి. ఆనాటి శిల్పుల నైపుణ్యాన్ని మనం ఆలయ స్థంబాలపైనా చూడవచ్చు.  గర్బాలయంలో కొలువైన సీతాలక్షణ హనుమంత సహిత శ్రీరాముల వారిని దర్శించుకొన్నాక పక్కన అశ్వత్థ వృక్షం కింద ఉన్న నాగులకట్టకు పూజలను భక్తిశ్రద్దలతో ఆచరిస్తారు.  వివిధ నాగదేవతల శిలా రూపాలు భక్తులకు దర్శనమిస్తాయి. ఎంతో మంది మహిళా భక్తులతో ఎప్పుడు రద్దీగా ఉంటుంది. ఇక్కడ కొలువైన నాగదేవత సంతానప్రాప్తి కలిగిస్తుందని చెప్తారు. తరువాత ఇక్కడి సమీపంలో జమ్మిచెట్టు రామజప స్థూపమును దర్శించుకోవచ్చు. ప్రధాన ఆలయం ఎడమవైపు భాగంలో గోవిందరాజుల ఆలయం ఉంది.  గోవిందరాజుల ఆలయ సందర్శనం తరువాత భక్తులు క్షేత్రపాలకుడైన చెన్నకేశవస్వామిని దర్శించుకొంటారు. కొట్టాయ మండపంలోనే స్వామివారి కళ్యాణ మహోత్సవాలు నిర్వహిస్తారు.

మరో పురాణ గాథ ప్రకారం భృగు మహర్షి మహావిష్ణువు అనుగ్రహం కోసం తపస్సు చేయగా స్వామి ప్రత్యక్షమై తాను ఇక్కడున్న భృగుతీర్థమందు వేంచేసిఉన్నానని తన ప్రతిబింబాలను పూజించి లోకమునకు వెల్లడించమని ఆజ్ఞాపించాడు అంటారు. కావున భృగుమహర్షి వసంత ఋతువు నందు వాటిని వెలికితీసి ప్రాణప్రతిష్ట చేసి వసంతవల్లభులు అనే పేరు పెట్టారట. ఇక్కడ స్వామి వారు వెలసిన ఇంకో కారణం ప్రాచుర్యంలో ఉంది. హిరణ్యకశిపున్ని చంపిన తరువాత స్వామివారి రౌద్ర రూపాన్ని తగ్గించమని ఇంద్రాది దేవతలు ప్రహ్లాదులు కోరగా స్వామి శాంతించి ఇక్కడ ప్రహ్లాదునితో వెలశారని చెపుతారు.  ప్రధానాలయం ముందు భాగంలో పంచలోహాలతో నిర్మించిన అతిపెద్ద ధ్వజస్థంభం కనిపిస్తుంది. ఇక్కడ మొక్కుకొని తరువాత స్వామివారి దర్శనానికి వెళతారు.  అలనాటి రాజుల శిల్పకళాభిరుచికి ఇక్కడి స్థంబాలు మరియు ప్రాకారాలు ఎంతో అందంగా చెక్కబడి ఉన్నాయి.

1822 వ సంవత్సరము నుంచి ధర్మకర్తల ఆధ్వర్యంలో కదిరి దేవాలయ నిర్మాణాలలో పునరుద్ధరణ చర్యలు చేపట్టారు. అలాగే 1953లో దుర్గా ఆలయాన్ని అమృతవల్లీ ఆలయంగా మార్పు చేసినట్టు తెలుస్తోంది.  స్వామి దర్శనానంతరం అమృతవల్లీ ఆలయానికి చేరుకోవచ్చు. అమ్మవారి ఆలయానికి ఇరువైపులా చండీ ప్రచండి విగ్రహాలు కనిపిస్తాయి. ఇక్కడ ఆండాళ్ అమ్మవారిని దర్శించుకోవచ్చు. కదిరి క్షేత్రం గురించి బ్రహ్మాండపురాణంలో ప్రస్తావించడం జరిగింది. ఇక్కడి కదిరి కొండను స్తోత్రాద్రి అని అంటారు. ప్రధానాలయం నుంచి 3 కిలోమీటర్ల దూరంలో గల కదిరి కొండను దర్శించుకోవచ్చు. ఈ కొండపైన శ్రీ లక్ష్మి నరసింహ స్వామి ఉగ్రరూపాన్ని విడిచిపెట్టారని చెబుతారు. ఈ అడవిలో స్వామివారి ఆలయం మరియు స్వామి వారి పాదుకలు దర్శనమిస్తాయి. ఈ పాదాలవలనే స్వామివారికి ఖాద్రి అనే పేరు వచ్చినట్లు చెబుతారు.  ఇక్కడ సప్తఋషుల తపోభూమి ఉన్నది. సమీపంలో విగ్నేశ్వరుడు, సత్యనారాయణస్వామి ఆలయం మరియు నవగ్రహాదిదేవతల ఆలయాలు ఉన్నవి.